అడవి ఆముద చెట్టునే సంస్కృతంలో కానన ఏరండ అని పిలుస్తారు. Jatroph, Curcas అని ఇంగ్లీషులో పిలుస్తారు. ఇది ఇంచుమించు అన్ని చోట్లా బంజరుభూముల్లో విశేషంగా పెరుగుతుంది. దక్షిణభారతదేశంలో ఈ చెట్లను పొలాలకు కంచెగా పెంచుతుంటారు. దీని ఆకులు, పసరు, గింజలు, చమురు, కాడలు, వేళ్ళు కూడా చికిత్సకు ఉపయోగిస్తారు.
అడవి ఆముదం గుణములు
- అడవి ఆముదం మొక్క నుంచి తీసిన నూనెను పది నుంచి 20 చుక్కల వరకూ లోనికి పుచ్చుకుంటే ఒక ఔన్సు ఆముదం పుచ్చుకుంటే ఎన్ని విరోచనాలు అవుతాయో అన్ని అవుతాయి. కావున చాలా తక్కువగాను, అతి జాగ్రత్తగాను ఈ అడవి ఆముదాన్ని వాడాలి.
- ఈ చమురు దురదలు, గజ్జి, చిడుము, ఏనుగుగజ్జి, మొలగజ్జి, తామర పోగొడుతుంది. కురుపులు, గాయములు, పుండ్లు త్వరగా మాన్పుతుంది.
- అడవి ఆముదం మొక్క ఆకులు నిప్పుల మీద వెచ్చచేసి స్తనముల మీద వేసి కట్టి కొంచెం సేపు ఉంచినట్లయితే చనుబాలు వృద్ధి అవుతాయి.
- దీని ఆకులకు ఆముదం రాసి నిప్పులమీద వెచ్చచేసి వాటితో రుద్దినట్లయితే ప్రమేహపిటకలు, విద్రధులు పోతాయి.
- అడవి ఆముదం కాడల నుండి వచ్చే జిగురువంటి ద్రవము పూసినట్లయితే గాయములు, వ్రణములు, నరుకులు మొదలైన వాటినుంచి స్రవించే రక్తము వెంటనే నిలిచిపోతుంది. ఇదే జిగురు గజ్జి, చిడుము, ఏనుగుగజ్జి, తామర, మొలగజ్జి మున్నగు చర్మవ్యాధులకు మిక్కిలి మంచిమందు.
- దీని వేరుపట్ట ఆమవాతము పోగొడుతుంది.
- ఈపట్ట, కొంచెం ఇంగువ కలిపి నూరి లోపలికి మజ్జిగతో కొంచెం ఇచ్చినట్లయితే అగ్నిమాంద్యములు, అతిసారము తగ్గుతుంది.
- అప్పటికప్పుడు కోసిన అడవి ఆముదం కాడలతో పళ్ళుతోముకుంటే చిగుళ్ళు గట్టిపడతాయి. నోటి దుర్వాసన పోతుంది. పళ్ళ నుంచి రక్తము కారటం తగ్గుతుంది. దంతములు గట్టిపడి ఎప్పుడూ ఊడకుండా ఉంటాయి.
