అజీర్ణరోగాలకు, జ్వరాలకు వనమూలికావైద్యంలో ఉపయోగించే మొక్క కన్నెకోమలి. గిరిజన ఆయుర్వేదవైద్యులు సైతం గ్రామాల్లో చేసే వైద్యంలో ఈ మొక్కను ఉపయోగిస్తారు. తూర్పు ఏజెన్సీ ప్రాంతంలోని అడవుల్లో లభించే ఈ మొక్కను వైద్యం కోసం ఇళ్ళల్లో కూడా వేసుకుంటున్నారు. సుమారు మూడు మీటర్ల ఎత్తు వరకూ తీగలా ఎగబాకే ఈ మొక్క ఆకులు, కాండం వంటివి ఆయుర్వేద చికిత్సలో ఉపకరిస్తున్నాయి.
కన్నెకోమలి మొక్కలో ఔషధగుణాలు
- దుంప చేదు, వగరు గుణములు కలిగి ఉంటుంది. వేడిచేసే స్వభావము కలిగి ఉంటుంది.
- త్రిదోషములను హరిస్తుంది.
- దుంప రసమును మేకపాలతో కలిపి పరగడుపున తీసుకుంటే శుక్ల నష్టములు నివారింపబడతాయి. ఇలా వారమురోజుల పాటు సేవించినచో ఫలితము కనపడుతుంది.
- కన్నెకోమలి ఆకుల రసములో కొబ్బరినూనె కలిపి రాసినట్లయితే కాలిన పుండ్లు మాయమవుతాయని వస్తుగుణప్రకాశిక అనే గ్రంథం వివరిస్తోంది.
- దగ్గు, వళ్ళునొప్పులు, జ్వరాలు, ఉదరసంబంధ వ్యాధులు వంటివి కన్నెకోమలి మొక్కద్వారా నివారణ అవుతాయి.
- పత్రాల కషాయం, వేరు చూర్ణం వంటి రూపాల్లో ఈ మొక్కను మందుగా వాడతారు.
- కాండాన్ని ఎండబెట్టి చూర్ణంగా తీసుకుంటే జ్వరం నయమవుతుంది.
- కడుపులోని జీర్ణసంబంధ వ్యాధులు కూడా నివారణ అవుతాయని వైద్యులు చెబుతున్నారు.
- గ్రామీణప్రాంత ఆయుర్వేద వైద్యంలో ఈ కన్నెకోమలి మొక్కకు అత్యంత విశిష్టత ఉంది.
