అతిమూత్ర వ్యాధికి విరుగుడు ‘పొడపత్రి’ చూర్ణం

ఆస్క్లిపియడేసి కుటుంబానికి చెందిన పొడపత్రి శాస్త్రీయనామం జిమ్నిమా సిల్వష్టర్(రిట్జియస్)(Gymnema Sylvestre) ఘల్ ట్జ్ . ఇది ఐదు నుంచి పది మీటర్ల వరకు పెరిగే బహువార్షికపు తీగ. పత్రాలు కణుపుకు రెండు చొప్పున దాదాపు అండాకారంలో ఉంటాయి. పత్రాలపై నూగు ఉంటుంది. పుష్పాలు లేత పసుపు రంగులో ఉండి, గుత్తులవలె వస్తాయి. ఫలాలు సన్నగా, పొడవుగా, జంటలుగా ఉంటాయి. విత్తనాలకు దూది ఉంటుంది. పొడపత్రి మొక్క పుష్పాలు, ఫలాలు జూలై నుంచి నవంబరు మాసాలలో లభిస్తాయి. ఈ మొక్క ఆంధ్రప్రదేశ్లోని అన్ని అరణ్యాల్లోను పెరుగుతుంది.

పొడపత్రి ఉపయోగాలు

ఈ మొక్క పత్రాలు, వేర్లు, విత్తనాలు వైద్యపరంగా ఉపయోగిస్తారు. ఈ మొక్కలో హెంట్రియా కంటేన్, ట్రైట్రయా కంటేన్, జిమ్మ్నిమిక్ ఆమ్లం, జిమ్నమైన్ వంటి రసాయన పదార్ధాలుంటాయి. ఈ మొక్క పత్రాలను నమిలిన తర్వాత తీసి వస్తువులను తింటే చప్పగా ఉంటాయి. వేరును పొడపాము కాటుకు విరుగుడుగా వాడతారు. కరచిన చోట దీని పొడిని చల్లుతారు.

మూడు నెలలు వరుసగా పత్రాల చూర్ణం తీసుకుంటే అతిమూత్రవ్యాధి తగ్గుతుంది. పత్రాల కషాయం, జ్వరం, దగ్గును తగ్గిస్తుంది. పత్రాలను ఆముదంతో కాచి, దానిని ఉబ్బిన గ్రంధులపై పూస్తే తగ్గుతాయి. వేరు పత్రాలను విరిగిన ఎముకలు అతుక్కోవడానికి ఉపయోగిస్తారు. కడుపునొప్పిని తగ్గిస్తాయి. మూత్రాన్ని జారీచేస్తాయి. శరీరానికి శక్తినిస్తాయి. చలువచేస్తాయి.

ఫలాలను ఆకలిని పుట్టించడానికి లెప్రసి, బ్రాంఖైటిస్, కడుపులో క్రిములు, అల్సర్ లు, మూత్ర సంబంధ వ్యాధుల నివారణలో వాడతారు. పత్రాలు కండ్లవ్యాధులు, గుండెజబ్బులు, కామెర్లు, మూలశంఖ, మూత్రాశయంలో రాళ్ళు వంటి వాటిలో ఉపయోగిస్తాయి.

ఆయుర్వేద మందులల్లో పొడపత్రి: వరునాదికషాయం, వరునాదిఘృతం, మహాకల్యాణకఘృతం, అయస్కృతి వంటి మందుల తయారీలో పొడపత్రి ఉపయోగపడుతుందని వైద్యులు చెబుతున్నారు.