బలాన్ని కలిగించే అక్రోటులు లేదా వాల్ నట్స్

ఈ వృక్షాలు కాబూల్ దేశంలో విస్తారంగా ఉంటాయి. పువ్వులు తెల్లగా ఉండి జూకాలలా ఉంటాయి. ఆకులు పెద్దవిగా ఉండి వ్రేళాడుతూ ఉంటాయి. ఇది బాదాము జాతికి చెందినది. దీని గింజలనే వైద్యములో ఉపయోగిస్తారు. అయితే నిలువ ఉంచిన పాతకాయలోని గింజలను తింటే చేదుగా ఉంటాయి. వీటిని వీర్యవృద్ధికోసం తరచుగా వినియోగిస్తారు.

అక్రోటు లేదా వాల్ నట్ గింజలు కొంచెం తీపిగాను, కొంచెం పుల్లగాను ఉంటాయి. అయితే ఇవి వేడిచేసే స్వభావము కలిగి ఉంటాయి. రుచిని పుట్టిస్తాయి. వాతముతో కలిగి ఉన్న పైత్యము, వాతము ప్రధానముగా ఉండే క్షయవ్యాధి, గుండె సంబంధ వ్యాధులు, రక్తంలో దోషాలు, రక్తములో ఉన్న పైత్యము పోగొడుతుంది. ముసలివాళ్ళకు శరీరపటుత్వము కలుగచేసి ఉత్సాహవంతులుగా ఉండేలా చేస్తాయి.

కఫము, పైత్యమును కలుగచేస్తాయి. శరీరమునకు బలమును కలిగిస్తాయి. మలబద్ధకము కలిగిస్తాయి. దీనికి విరుగుడుగా ద్రాక్షరసముగాని, పుల్లదానిమ్మ పండ్ల రసముగాని, నిమ్మరసంగాని, మాదీఫల రసముగాని త్రాగవలెను.